Лёсс буюу Алтан химэрлэг ул хөрс нь устай хүчтэй харилцан үйлчлэлд орж нэмэлт суулт үүсгэдэг шинж чанартай. Дэлхийн хуурай газрын нэлээд хувийг эзэлдэг. Хойд ба Өмнөд Америк, Шинэ Зеланд, Франц, Төв Европ, Азийн улсуудаа элбэг байхаас гадна хойд Хятад, Энэтхэг ба Монголд тархсан. Алтан химэрлэг маягийн суулттай ул хөрс нь манай орны Сэлэнгэ аймгийн нийт нутаг, Булган аймгийн хойт хэсэг, Төв аймгийн хойт хэсэг, Дорнод аймгийн Халх голын сав газар, Хэнтий, Сүхбаатар аймгийн нутгаар хэсэгчилсэн байдлаар тархсан байгаа нь сүүлийн 40 гаруй жилийн турш явуулсан судалгаанаас харагдаж байна. Монгол орны нутаг дэвсгэрийн 30% орчимд алтан химэрлэг ул хөрс тархсан байдаг. Эндээс хамгийн сайн судлагдсан район нь Дархан-Сэлэнгийн сав газрын суулттай ул хөрс болно. Суулттай шинж чанартай алтан химэрлэг маягийн ул хөрс монгол оронд тархсан ба хул шаргалаас бор шар өнгөтэй сийрэг бүтэцтэй, сүвшилийн үзүүлэлт нь 55-64%-д хүрдэг, үелэлгүй тогтоцтой, хуурай байдалдаа цахиуржсан (SiO2) тоосонцорын хурдас юм. Устай хүчтэй харилцан үйлчлэлд орж суулт, цөмрөлд үүсгэдэг.